Key – Bb 4/4
Thinsung le awtawTopa poktong,
Ama sung ah lungdam tong,
Lamdang hong itna la in satong,
Hi la sa tawntung tong.
Ama’n ka mawna teng lasiat zo, Amin thiang pok vun, Amin thiang pok vun; Ama’n ka mawna teng lasiat zo, Hallelujah min pok vun
Thinnop hiithiat kanga natu in,
Ka mawna taw ka pai ciang;
Ka thungetna za in hong maisak,
Hi la sa tawntung tong.
Ka hu tawpna taw. Ama pok tong,
Thina a zaw man in a;
A tawntung in Ama min poktong,
Hi la sa tawntung tong. ____________________ He has Taken my Sins Away John 1:29 Sizang labu – 352
Pathian hong hesuakna
A tup ngupna kicing;
Maw nei mite honghun tu in,
Hesuakna sung hong teal.
Hesuakna taw hong hun hi, Upna, upna, Nang kihut tawm thei hingawl hi; Pathian hong piak hesuak na hi, Sep hingawl, sep hingawl, Sep hile ki suangtak tha tu hi, Pathian hong piak thong hi, Sep hile ki suangtak tha tu hi, (Pathian hong piak thong hi) 4 Hong piak thong hi.
Pathian hong hesuakna
Jesu tung kilangh sak;
Maizumhuai lamte na thuak in,
Hesuakna hong telsak.
A um takpi mite,
Pathian in hong telsak;
Hesuakna hang ngupna kicing,
Tate ki ciamtee zo. ____________________ By Grace Are Ye Saved Eph.2:8; John 1:14 Sizang Labu – 461
Key – G
:s, | d :- :m .d | m :- :r | d :- :- l : s
Athuthiamna in lamdang hi,
Kei bang lei hong hun a,
A manghthang kei hong kimu kik,
Mittaw khua hong mu sak.
Thuthiamna in lauhuai thu le,
Suataakna thu hong hil,
Thuthiamna ii a manphatna,
Ka up ciang hong tel sak.
Lauhuai thangsia na pan in,
Nang kung kong zuan zo hi,
Thuthiamna in hi ciang hong then,
Inn dong hong cia pui tu.
Van ah eite ni bang tang a,
Pathian pokna late,
Kum tul kum mun a ngei zongin,
Tatsat ngawl sa tu hi.
____________________ Amazing Grace Sizang Labu – 75 I Cor. 15:10, Eph. 2:8-9
Amazing Grace Taangthu
Tapidaw la (hymn) thu, son tu hi leang, “Amazing Grace” thu a kihel buale piicing ngawl tu hi. Amazing Grace la sia Tapidaw la theampo sungpan a kihe bel, a kisa bel le tamvei a kikhen (laibu) la khat hi. Baptist pawlpi te ii pawlpi lapi (Anthem) hi ci in zong a kici liang tapidaw la hi. TOPA ii thuthiamna (Grace) thu, son tu hi leang lamdang lalawm in thuum vahiit leang hi (Amazing) ci tu ngawl dang bangma om ngawl takpi thong hi.
John Newton ii phuak tapidaw la hi aa, ama sia London khuaah 1725 kum in suak hi. Kum 6 a phaak kum aa, a nu thi hi. A nu sia Pathian a zakta mama, thunget a haat mama khat hi aa, “Patang khat ii a nuntakzia tu na hil vun, tua hile a khan tawntung in ciamtee tu hi.”(Proverb 22:6) ci Lai Thiangtho kammal siisan in a tapa panta to hi. “Amazing Grace” la in John Newton atu a manh nei mama tetti pha mama suak hi.
Olney Biakinn sungah John Newton ii lim tuni dong ki suang
Hi la ii original sungah dawng 6 om aa, tu ni ih sasak dawng khatna pan dawng thumna dong ii lamal sia John Newton ii phuak hi. Amasa bel “Onlney Hymns” laibu sungah kikhen aa, a thulu “Faith’s Review and Expectation” ci in kipia hi. A lamal hoi tatak sim leang, John Newton in theology taw kisai heak hau mama ci thu kimu thei hi.
Amazing Grace how sweet the sound, (Athuthiamna in lamdang hi) That saved a wretch like me (Kei bang lel hong hun a) I once was lost, but now am found (A manghthang kei hong kimu kik) Twas blind but now I see (Mittaw khua hong mu sak)
Emory H. Bancroft na Grace (Thuthiamna) ii khiakna in “Mawnei mite atu a kilawm ngawl hamphatna” hi ci hi. Lai Thiangtho thuciam thak sungah Grace (Thuthiamna) ci kammal 170 saang atamzaw kiat hi. TOPA ii Thuthiamna grace ih ngaisut ciang, Ephesuste 2:8 ih ngaisutna sungah ih phawk kikik hi. “Banghangziam cile note in upna tungtawnin Pathian thuthiamna taw ngup sa na hi uh hi. Tua in note hanciamna hang hi ngawlin, note kisuantaak thaak ngawl natu in Pathian letsong ahi hi.”Laphuak thiam John Newton ii son noppi thu in hi thu ahi hi.
“Kei bang lel hong hun a” ci lamal ih sak ciang mihingte ii kicin ngawlna, ih kisapna tam mama ih nei hunlam hong phawk sak hi. Adam le Eve sung pan a piang mihing theampo kuama a kicing ih om bua hi. Romte 3;10, 3:23 Thuhilsya 7:20, le I John 1:8 sim leang mihingte ii ih kicin ngawlna kician tak in hong phawk sak hi. Kicinna nei ngawl ih hikom, TOPA sungah mithak suakikna, pianthakna peal ngawl kisam ci thu John Newton in tel sitset hi. Sawltakte 4:12 sungah “Ngupna sia ama bek tungtawn in kinga thei a, van nuai ah eite hong ngum thei tu in, Pathian piak min dang khat zongh om ngawl hi,”ci hi. Salvation (Ngupna) linlian bekma TOPA tung ih thet thei natu lampi le thu ahi hi. Mihingte in a mangthang abo ih suak natu bangma vawt kul ngawl hi, banghangziam cile, mihing theampo in a mangthang, abosa ih hisiat hi. Ih nu ngil sung pan ih suak phet kipan a mangthangsa abosa vive kihi siat hi. Vantung ngam a theng ngawl lilim tu in a piangsa ki hi siat hi. Tua ahikom mihing minpiang theampo in bona pan vantung ngam ih thet kik thei natu NGUPNA ih kisam hi. A bosa, a mangthangsa ih pumpi sungah nuntakna ih nga kik natu TOPA Jesu ih sung hong ten, hong om tu kisam hi. Tua ahikom John Newton na “Amangthang kei hong kimu kik, Mittaw khua hong musak” ci hi. Lai Thiangtho sungah mihing a bo a mangthangte mittawte taw sonte hi. John 9 sung TOPA Jesu na mittaw khat khua a mu sak kik thu, John Newton na sim ngei nanaak tu in ka um hi.
Dawng 2na sungah Thuthiamna in lauhuai thu le, Suataakna thu hong hil, Thuthiamna ii a manphatna, Ka up ciang hong tel sak.
Dawng 2na ih sim ciang Thuthiamna ngawl bangma dang a om ngawl na thu John Newton in ciantak in at hi. Thuthiamna in a thupi mama thu 2 hong hil aa, a khatna in a bo a mangthang ka nuntakna in bangzata in lauhuai ci thu hong tel sak hi. A 2na in TOPA Jesu ka up ciang, tua lauhuai bona, mangthanna pan koibang suakta tu ci thu hong hil hi. John Newton in a dawng 2na a at kakawm in a thin sungah Romte 10:9 ngaisun kawm, phawk kawm tha tu in ka um hi. “Jesu sia Topa hi ci in na kam taw na pualaak a, na thinsung panin, ama sia thina pan Pathian in tho sak kik hi ci in na um le ngupna na nga tu hi.”
Amazing Grace la a phuakna mun/biakinn
Upna taw kisai sontena khat ah hibang in kison hi. Tokhum khat in na ngitna hong puazo tu na um le a tungah na to ngam tu hi. Muang vanglak ate a tungah na to buale, a um thathong bekma na hi aa, bangma phattuamna na nga bua tu hi. Na muan na up bangma a tungah na to ciang, tokhum in hong puak zawk hunlam na he tatak pheang tu hi. Na heak tatak thei natu na to sin tu kul aa, na kipiak phot tu kisam hi. Na um takpi le na ngamtatna taw na zui kul hi. Tasiaciang, na upna piicing pheang hi. Suapui awng, TOPA Jesu na um takpi le TOPA atu na kipiak ngam tu kisam lai hi.
Dawng 3na ento lai tawng: John Newton ii nuntak zia hesa ih hile dawng 3na ih sak ciang ih thin ih lung hong kha hong la mama tu in ka um hi.
Lauhuai thangsia na pan in, Nang kung kong zuan zo hi, Thuthiamna in hi ciang hong then, Inn dong hong cia pui tu.
Kum 6 a phak kum a nu in nusia ahikom, tembaw Captain ahi, a pa pai nana zui in tuipi tungah a patang hun nei susun zangh hi. Hun khat a thet ciang British navy sung tum hikale, a kaltat mama khat in kiciamte hi. A nasep nusia in tai thaap ahikom kiman in thong taak aa, mihon mai ah saat thuak in dann kipia hi. Nikhat ni ciang sal (slave) man tembaw khat ii captain suak hi. Khat vei Brazil pan a tembaw taw hong cia aa, tuipi tung ngei mama hun zangh ahikom, “Imitation of Christ” a kici laibu khat sim hi. Tua laibu sia kum 300 malai ‘Thomas Kempis‘ ii at laibu hi. Tawmvei zawk ciang huipi suangvaal nasia tatak in hong vaa aa, a tembaw tuipi sung tumsuk cip dektakza dong in lauhuai hi. Huipi suangvaal hong thai kik ciang John Newton in nuntakna le thina cisia bang hithong ziam ci in a ngaisutna sung hong piang hi. Ama le ama a bo, maw ahihunlam hong tel thiang hi. A no mama lai a nu ii a hil ngei TOPA kammalte hong phawk kik aa, kisiikna tatak taw khup din in thu ngen aa, TOPA Jesu ngumpa le tanpa in saang thei hi. Lauhuai huipi suangvaal nasia mama pan suatakna nga bek domngawl tawntung nuntakna a ngana thu dawng 3na sungah kician tatak in kimu thei hi. A thuak leitung thina le hell sung a zuatna pan suatakna a nga sia, TOPA ii thuthiamna liinlian bekma hi ci thu ama in thiang tak in kitel hi.
Suatakna nga in hong pianthak ciang, a nasepna mun laih aa, sal man tembaw tung pan pulpit tung hong theng hi. A khan tawntung tuipi tung hun bo aa, tuipi tung nuam a sa mama John Newton tuipi hong nusia hi. Pathian thu thuukte kum 16 sung hong sin aa, Anglican pawlpi in English khuano khat ahi, Olney khua pawlpi keam tu in nasep pia hi. “Amazing Grace” la sia hi Olney khua pawlpi keam a sep sung a phuak hi. John Newton son bangma (Amazing grace how sweet the song) hi la bangzata in thum aa, lamdang ziam!!
Dawng 1 pan dawng 3na dong John Newton ii phua, at hi John Newton in a lamal, laingual phuak ahihang a la aw sia Edwin Excell na 1910 kum aa vawt hi. Tuhun ih sak dawng 4na zong ama na belap ahi hi.
Siyin Hymns & Praise Songs 