Thaa Atu In Pha Hi

Key – Db
Damtui luan neam bangin ka nun anuam zong,
Heena tuihual bang hong khang zong;
Bangpo tawk ka leng, Nong hil bangma in a,
Phabel hi phabel hi, Thaa atu.

Apha hi Thaa atu,
Apha hi Apha hi Thaa atu.

Doai in hong theam a, haksatna ka thuak hang,
Ka thaamuanna in hong nuamsak;
Topa Jesu in ka cimawk hong he a,
Ka thaa atu Achi hong bua hi.

Ka mawna a heapbek hingawl a vekpi’n,
Thinglamte tung kilsiat zo hi;
Ka mawna teng bozo ka lung adam hi,
Topa tung lungdam in ka thaa awng.

Topa nong pai kik tu kong ngakla uh hi,
Ko tupna Hell hi ngawl vantung;
Ka thaa toithai na ka lamet ka lawpna,
Vantung mite lemle turn tahen.
____________________
It Is Well With My Soul
Sizang labu – 332
Ps. 55:18

La piankhiana taangthu

Spafford

Horatio Spafford (1828-1888)

Horatio Spafford (1828-1888) sia Chicago khuaah inn pha mama sung a teang lawyer minthang mama khat hi. Tanu meal hoi mama 4 le tapa khat nei hi. Pathian thu um mama aa, nisim Lai Thiangtho a sim valeng, naa theampo thungetna taw kal asuan tapidaw pha mama khat hi. A kithol pui a it mama angualtam sungah biakna sung a minthang Dwigh L. Moody, Ira Sankey cite zong kihel hi. A nasep senpi mama aa, sum le pai lamsang zong cimaw ngawl nuam a sak mama laitak khat bek a nei a tapa thi hi. A tapa thi in a khuangaina zong thai ngawl lai, October 8, 1871 ni, Chicago khua kaang aa, a neisa a lamsa theampo vut suak siat laleo hi. TOPA hesuakna taw amate nupa le a tanu 4 suakta hi.

A innkuanpui teng ii khuangaina lian lei ahikom, thin nopnapo a nga thei thale ci in, 1873 kum ciang, a innkuan pui teng Europe ah vacation paipui tu vaihawm hi. Europe a pai nopna thudang khat sia, evangelist minthang mama a lawmpa D.L Moody ii England crusade ah kihel nuam ci thu hi. A pai papeet tu ciang, a nasep thupi pawl khat manh thei ngawl ahikom azi le atanu 4 pai sak masa aa, ama nung zui tu hong suak vatun hi. A innkuan puiteng ii din zong khua ngei ngawl thiikkhau lai tomno khat a zi kungpan nga hi. Tua thiikkhau lai sungah, “keima bek suakta, bang law tu khiziam? (Save alone what shall I do) ci hi.

November 22, 1873 ni, a zi le tanu 4 ii zui Ville du Havre teambaw le British teambaw khat tuipi tung kitaih tha aa, a tanu nei theampo a 4 ma tuipi sung thi siat hi. Passenger 307 sung pan 81 suakta in adangteng thi hi. A zi Anna Spafford sia vanh khat zam in tuipi tungah khuaphawk nawn ngawl in a om laitak, American teambaw “Trimountain” theng ahikom, suakta hi.

Anna Spafford na athuakna hibang in son hi. Ka tanu Tanetta (kum 2) sia ka tha nei tawpza taw ma hanciam in zam linglengma tuipi sung ka kisaan phot hi. Ka ban tung zong liam zo kahikom bangzata ka hanciam hang ka tha hong neam mama. Tasia laitak tuihual hat mama khat na hong vaat aa, vanhbek khat na ka nausen Tanetta taw khan tawntung kikhen tu in hong laaksak hi, ci in kap vaven in son kik hi. Tua zawk ciang khua ka phawk vaset nawn bua aa, ka heakkik masakbel sia, ngunkuang hot aw hi ci hi.

Wales ngam Cardiff khua kipuak aa, tuakpan a pasal thiikkhau lai thak hi. A thiikkhau lai tom mama ahihang, a sim ciang, athin alung a kibalnen bangza in thuakhak sa in khuangai mama hi. A nungta lai a zi del tu in teambaw taw England pai hi. A tanu te 4 thiina mun kiim a thet tu hun teambaw captain tung dong aa, tua mun kiim a thet ciang Sizang kam in “Damtui luan neam bangin ka nun a nuam zong…….” ci in ih phen kik anuai aa laingual at hi.

It is well with my soul original

A tanu 4 thina mun kiim a thet ciang a at, laingual original

AnnaAnna ii thu a he mama Nathaniel Weiss a kici pastor khat na, Anna ii thu son ngei khat hibang in son kik hi. TOPA na tanu pha mama 4 hong pia aa, ama na hong laaksak kik siat zo. Ni khat sasaang ciang banghang ziam ci thu tel tu kium ing. Khuangai mama ahikom a pawl a lawm theampo na, ama le ama a kithalup thak tu lau in encik hi. Ahihang Anna in a bil ah aw neam khat za vahiau tawntung hi. Nang a suataak thathong hi ngawl aa, ngiimna om ahikom a suakta ni hi ci in TOPA paupui za ahikom, nuam ih sak laitak bek TOPA it tu hi ngawl aa, nuam ih sak ngawl ciang zong TOPA it lingleng tu ci a lawm te khat ii son tawntung thu tel saseam hi.

TOPA na amate innkuan thupha pia aa, ta 3 nei kik hi. 1876 kum in tapa khat nei aa, Horatio ma ci in min phuak hi (A pata min kibang). 1878 ciang tanu khat nei kik aa Bertha ci hi. A tapa Horatio sia kum 4 aphaak ciang a upa thina scarlet natna nga in thi laleo hi. 1880 kum in tanu khat nei kik aa Grace ci in min pia hi. A tapa kik Horatio thi zawk ciang kipan Jerusalem ah tai tu uk ahikom, 1881 kum ciang Israel ngam Jerusalem khua ah a teang suak tu in pai hi. 1888 October 16 ni Malaria natna taw Jerusalem khua ah thi hi. A zi Anna sia 1923 a thi dong Jerusalem khua ah teang suak in Pathian atu na seam hi. A innkuan in Jerusalem khua ah thi hi, TOPA in amate thaa atu a hoibel na munh ah tawntung tawlngahna pia hi tha tu hi.

storms of life

Tuipi tungah a at laingual sia, P.P.Bliss a kici music thiam mama khat na 1876 in la aw phuak aa, tu ni ih sak “It is well with my soul” ci tapidaw la minthang mama khat hong piang ahi hi. Hi la sia, D.L. Moody ii Chicago’s Farewell Hall ah November 24, 1876 ni amasabel kisa hi.

Dopha [Yahoo Book]

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s